Sa Post na ito, i-sheshare ko sa inyo ang mga moments na nagtrend ngayong taon. Wala akong ginamit na survey dito, walang statistics, walang percentage. Ang tanging basehan ko sa pagpili ng mga ito, ay kung paano ang mga ito ay, pinag-usapan sa TV, sa Radyo, sa loob at labas ng Internet at iba't ibang Social Media, at sa mga taong nakakasalamuha, nakakasalubong at nakakasama sa araw araw.
Eto na talaga, ang mga listahan ko ng Sampung mga Moments/Pangyayari na nag-Trend ngayong 2012.
10. Ang Magnum Craze
Ang Over priced na Ice Cream on stick na ito from Selecta ay may tatlong flavors nang ma-introduce sa Philippine Market. May Chocolate Truffle, Almond at Classic Flavors. Singkwenta pesos ito kung bibilhin mo sa mall, sa supermarket at sa iba pang ice cream stations. Hindi ba't napakamahal para sa isang typical na Ice Cream on Stick? 55 pesos pa ito kung sa mga convenience store ka bibili, tulad ng naranasan ko. Ang kinaibahan lang kasi ng Magnum Ice Cream sa ibang Ice Cream on stick, Ito ay nababalot ng Belgian Chocolate na sa tingin ko ay nagpamahal sa presyo nito.
Pero kahit mahal ang mga ito, ay pumatok ito sa masa. Sikat ka sa mga kwentuhan kapag nakatikim ka nitong pinagmamalaki na Magnum Ice Cream ng Selecta. Ang iba pa nga ay nagpost ng picture sa social media kasama ang ice cream na ito, pati ang stick nito ay kinukuhanan ng litrato kapag ubos na dahil sa markhang letrang M sa dulo ng stick, at ang wrapper, pruweba naki-isa ka rin sa Magnum Craze.
9. Mga Kalamidad na tumama sa Ating Bansa
Habagat
Isa lang sa kalamidad na tumama sa ilang lugar sa Luzon.. Ngunit, hindi ito kailanmang itinuring isang bagyo, dahil ang kalamidad na ito ang nagdala lamang ng malakas na ulan dulot ng hanging Habagat. Ngunit hwag basta bastahin ito, lahat ng makakabasa nito ay sasang-ayon na, mas matindi pa ang pinsalang hatid nito kumpara sa Bagyong Ondoy noong 2009. Mas doble ang pinsalang hatid nito, marami ang binaha ng husto, kahit ang mga lugar na hindi mo inaasahang bahain ay hindi nakalusot sa hagupit ng habagat.
Bagyong Pablo
Ngayong buwan lang na ito, sinalanta ng Bagyong Pablo ang ating mga kababayan sa Katimugang bahagi ng bansa. Sabi ng karamihan ay mas matindi pa ang dinulot na pinsala nito kumpara sa Bagyong Sendong noong nakaraang taon. Ang higit na tinamaan ng bagyong Pablo ay ang mga kababayan natin sa Compostela Valley at Davao na kung saan, itong bagyong ito ay kumitil ng mahigit isanlibo katao at may mga natatala pang nawawala.
Sa mga pagkakataong ito, nakakahanga ang tibay at determinasyon ng ating mga kababayan para bumangon sa nasapit na trahedya, gayundin hindi rin matatawaran ang pagtutulungan ng bawat isa kapag sumasapit ang mga ganitong kalamidad.
8. Ang Sabayang Paglulunsad ng mga Talent Search sa bansa, mula sa Tatlong malalaking Istasyon
Ngayong taon ay nasaksihan natin ang pagbubukas ng tatlong malalaking Talent search sa bansa na muling nagbigay ng oportunidad sa mga nangangarap pasukin ang mundo ng showbiz at ipamalas ang mga angking talento.
* X Factor Philippines (ABS-CBN)
Ang Unang Edisyon na na-franchise mula sa UK. Isang singing contest na nagbigay oportunidad sa mga singing hopefuls of all ages. Tama, of all ages, dahil ang age limit nito ay mula edad 16 pataas, na hinati sa apat na categories, Boys (16-25), Girls (16- 25), Over 25's (Girls and Boys) at Groups. Para sa una nitong season, itinanghal na kaunaunahang X Factor Grand Winner si KZ Tandingan na mula sa Digos City, Davao. 4 million pesos ang naiuwi niya bilang Grand Winner.
* Artista Academy (TV5)
Ito ang ikalawang paglulunsad ng nasabing istasyon ng isang Artista Search, matapos ang Star Factor nung mga nakaraang taon. Sinasabing isa ito sa pinakaengrandeng Artista Search sa lahat, dahil sa Malaking premyo na maiuuwi ng mga nanalo sa kompetisyon. Edad 16 - 22 na mga lalaki at babae ang mga nagsipag Audition sa nasabing palabas. Dumaan sa maraming pag-sasala ang mga aspirants hanggang sa 16 scholars na naglaban laban para sa titulong Best Actor at Best Actress. Itinanghal na kaunaunahang winners sina Sophie Albert at Vin Abrenica at naguwi ng tig-10 million na halaga ng mga papremyo kabilang na ang cash, condo unit at contract sa TV5.
*Protege: The Battle for the Big ARTISTA Break (GMA7)
Ito ang ikalawang season ng nasabing palabas, at di tulad sa naunang season, Artista Search ang pinakatema ng palabas dahil kung matatandaan natin na nung unang season, Singing contest ang labanan ng show. Hidi rin naman magpapahuli sa laki ng premyo ang ipinamigay ng show na ito sa mga itinanghal na winners dahil tig-6 million na halaga ng cash,kontrata at iba pa ang nakuha nina Jeric Gonzales at Thea Tolentino.
7. Ang Magandang Placement ng ating mga Pambato sa larangan ng Beauty Pageants
Pagkatapos ng matagumpay na laban nila Venus Raj, Shamcey Supsup at Gwen Ruais, mas naging maganda ang kapalaran ng ating mga kababayan na nag-represent sa ating bansa sa kanilang mga sinalihang mga Beauty Pageants ngayong taon. Bagamat may mga hindi pinalad masungkit ang titulo, wala namang umuwing nakanganga, dahil ang pinakamababang narating ng ilan, ay hanggang sa semifinals. Oh, hindi na masama diba? may ilan naman na halos muntik nang masungkit ang titulo, at may ilan din naman na hindi nagpatalo sa maraming nakalabang bansa, at naiuwi ang titulo sa sinalihang kompetisyon.
Semifinalists
*Queenierich Rehman: Miss World 2012 Top 15
*Nicole Shmitz: Miss International 2012 Top 15
Runners-up
*Elaine Kay Moll: Miss Supranational 2012 3rd Runner-up
*Stephany Stefanowitz: Miss Earth 1st Runner-up
*Andrew Wolff: Mr. World 2012 1st Runner-up
*Janine Tugonon: Ms. Universe 2012 1st Runner-up
TITLE HOLDERS
*Kevin Balot: Ms. International Queen 2012
*June Macasaet: Manhunt International 2012
Nawa'y sa susunod na taon ay muling humataw ang mga ipapadala ng bansa sa mga kompetisyon tulad ng mga ito.
6. Mga panukalang batas na naging mainit sa mata ng lipunan
*RA 101-75:Cybercrime Law
Ito ang batas na mariing tinututulan ng mas nakararami sa ating lipunan. Paano ba naman ayon sa kanila ay nasusupress daw ang ating karapatan sa malayang paghahayag ng ating mga opinion, hinaing at iba pa. Isa sa mga nilalaman ng batas nito ang pagbabawal sa cybersex, website hacking at iba pa. Ngunit uminit ang ulo ng madla ng isingit sa batas nito ang "E-libel" na nagpoprotekta sa mga taong naaapi sa mga social media at mga blogging sites at marami pang iba. Dahil dito, bawal na ang haters, bawal ang cyber bullying. Kasalukuyang epektibo ang TRO laban sa batas na ito.
*RH Bill
Isa sa mga pinagdebatehan sa kamara, sa simbahan at sa iba pang lugar ang panukalang batas na ito. Bagamat mukhang lagda na lang ng pangulo ag kulang para ito ay maging isa nang ganap na batas dahil pasado na ito sa mga readings na isinagawa sa kamara, marami pa ring mga pabor at kontra dito.. Mariing tinututulan ito ng simbahan. Bagamat ang opinyon ng simbahan ay suportado ng ilang mga mambabatas, mas marami pa rin ang mga pabor dito, na nagsasabing maaaring isa ito sa maaaring maging isa sa mga solusyon sa kahirapan, tag-gutom, lalong lalo na ang mga hindi inaasahang pagbubuntis ng mga kabataang babae.
5. Ang magkasunod na pagkatalo ni Pacquiao sa boxing
*Pacquiao vs. Bradley Fight
Ito ang unang laban ni Manny ngayong taon. Bagamat hindi niya napatumba ang kalaban, na umabot pa sa split decision, Si Timothy Bradley Jr. ang ipinanalo ng dalawang hurado sa nasabing laban. Ngunit alam ng buong mundo na nahirapan si Bradley kay Pacman, at si Pacman ang dapat na nagwagi sa laban na ito. Ni-review ulit ang laban nila ng mga komite sa WBO at idineklarang si Pacman ang dapat na nanalo; ngunit ang nakakalungkot na parte nito ay hindi niya maaaring mabawi ang championship belt mula kay Bradley, pero sa kabilang banda ay maluwag na tinanggap ni Manny ang decision ng mga hurado.
*Pacquiao vs. Marquez 4
Matapos ng isang "kaduda-dudang" resulta ng laban nung isang taon na nagpanalo kay Pacquiao, muli silang nagharap ni El Dinamita sa ika-apat na pagkakataon upang tuldukan ang mga debate na kung sino talaga ang nanalo sa mga nakaraang laban nila. Ngunit sa huling segundo ng Round 6, napatumba ni Marquez si Manny sa sinasabi ng nakararami na "Lucky Punch" nito. Ngunit pagkatapos ng muli niyang pagkatalo, mas minahal pa siya ng kanyang mga tagahanga at ang sambayanang Pilipino. Maraming nag-alala sa kanyang kalagayan dahil sa mga common na sakit na kinahahantungan ng mga boksingero.
Marahil hindi ito ang maswerteng taon para kay Manny dahil sa magkasunod na pagkatalo nito. Naging usap usapan tuloy kung dapat na ba siyang mag-retiro sa kanyang paboritong sports, ang sports na nagluklok sa kanya sa maraming tagumpay. Ang maganda namang makikita natin sa mga pangyayaring ito ay ang maluwag na pagtanggap niya sa mga pagkatalong ito, at ang mas lalo pang pagiging malapit niya sa Panginoon.. Iba ka Manny! Saludo kaming lahat sa iyo! Idol! :)
4. Ang pagpanaw ng mga prominenteng tao sa Showbiz, Politics at iba pa.
* DILG Secretary Jesse Robredo
Isang masamang balita ang minsan ay bumungad sa sambayanan na ang isang eroplano ay nag-plane crash sa Masbate; ang lulan ng nasabing eroplano ay sina dating DILG Secretary Jesse Robredo at tatlo pang kasama nito. Isa lamang ang nakaligtas sa nasabing pag-crash. Ipinagmamalaki siya ng kanyang mga kababayan bilang isang bayani, larawan ng isang Magaling at patas na Lider kaya naman ayon sa kanyang mga kasamahan sa trabaho, siya ay malaking kawalan sa gobyerno sa mga panahong ito.
*Comedy King Dolphy Quizon
Labis na nalungkot ang Industriya ng Showbiz at mga taga hanga na ilang dekada ring pinatawa ng nag-iisang hari ng komedya na si Mang Dolphy Quizon. Isang haligi ng showbiz industry ang namaalam ngayong taon at lahat ng kanyang iniwan na pamilya at mga tagahanga ay nagluksa sa kanyang paglisan. Kilala si Mang Dolphy sa kanyang mga papel na ginampanan sa telebisyon at pelikula bilang si John Puruntong at Kevin Cosme.
Ilan pa sa mga namaalam ngayong taon ay ang tatlong mga batikang direktor na sina Mario O'Hara, Marilou Diaz Abaya at Celso Ad Castillo na nag-direct ng maraming mga pamosong pelikula. Malaking kawalan din sa larangan ng musika ang pagpanaw ng isa sa mga rock legends na si Karl Roy at ng dalawang International Singers na sina Donna Summer at Whitney Houston. Ang kanilang mga awitin ay mananatili sa puso ng mga mahihilig sa musika lalo na ng mga mahihilig umawit.
3. Mga Kantang pumatok ngayong taon
Marami ang mga awitin ang inilunsad ngayon, ang iba ay bumida sa mga hit charts at kumita sa mga music stores. Pero may ilang mga awitin na sadyang tumatak sa puso't isipan ng masa.
* Call me maybe
Ito ay awitin ni Carly Rae Jepsen, isa sa mga naging finalist ng Canadian Idol. Ang kwento sa music video na ito ay tungkol sa isang babae na labis na humahanga sa isang gwapo, makisig at matipunong lalaki na kanyang kapitbahay, ngunit sa bandang dulo ay nalaman niya na nahuhumaling din ito sa kapwa lalaki. Dahil sa ganda ng lyrics at melody ng kantang ito, madali itong tumatak sa madla. May mga lumikha ng sariling cover ng kantang ito, sila man ang mismong kumakanta,lip sync or talagang nagkakatuwaan lang.
*Gangnam Style
Ito ay pinasikat ng pamosong rapper ng Korea na si Psy. Bagamat hindi natin maunawaan ang nilalahad sa kantang ito, ito raw ay ang paglalarawan ni Psy sa lifestyle ng mga koreanong nakatira sa Gangnam City. Pumatok din ito sa madla hindi lang sa Korea, sa Pilipinas at sa buong mundo. Pumangalawa pa ito sa Billboard Charts at sadyang madali lang matutunan ang dance steps nito kaya patok din sa lahat, bata, matanda may ngipin o wala. Ang Music Video nito sa Youtube ay pumalo na sa mahigit 1 billion views at tinalo na ang music video ni Justin Bieber na Baby na nasa higit walong daang milyong views.
2. Mga Videos na kumalat at pinagpiyestahan sa social media (Viral Videos)
*Ang bata na hindi matanggap ang pagkatalo ni Jessica Sanchez sa American Idol
Pinangalanan ang batang si Laney nasa 5 or 6 years old, ang bata na bida sa isang video na umiiyak dahil sa pagkatalo ni Jessica Sanchez. Matapos hirangin si Phillip Phillips bilang ikalabing isang winner ng American Idol, isang video ang lumabas na tampok ang batang si Laney na umiiyak dahil hindi niya matanggap ang pagkatalo ng kanyang idolong si Jessica Sanchez. Ayon pa sa video ay nais pa nitong tumawag sa himpilan ng show at magprotesta dahil hindi nanalo ang kanyang idolo.
*Random Girl
Isang video na kuha ni Yuan Juan ang mabilis na kumalat sa ibat ibang websites at social media sa internet. Laman ng video na ito ang isang babae na kumakanta sa isang videoke sa loob ng isang mall. Lahat marahil ay humanga ngunit nagtataka kung sino ang nasa likod ng napakagandang boses na umawit ng pamosong awitin ni Jennifer Holiday na "And I'm telling you I'm not Goin'". Kinilala ang babae sa video na si Zendee Rose Tenerefe na tubong Gen. Santos City. Ayon sa kanya, hindi niya inaakalang may kumukuha sa kanya ng video habang kumakanta. Dahil sa pagkalat ng kanyang video, dumating ang hindi niya inaasahang big break niya sa music industry. Nagkaroon siya ng mga tv guesting, tv commercial at tv guesting sa ibang bansa at may hawak ng isang recording contract.
*AMALAYER
Ang video na ito ay tungkol sa isang galit na estudyante na sinita ng isang lady guard sa isang LRT Station. Tampok sa video na ito ang isang estudyanteng si Paula Salvosa at isang Lady Guard sa isang istasyon ng LRT. Mabilis ding kumalat ang video sa iba't ibang social media at naging mainit ito sa mata ng mga netizens. Umani ng maraming negatibong komento ang putol na video na ito lalo na si Paula, ang estudyanteng nasa video.. Ngunit makalipas lamang ng ilang linggo, ginawa na lamang itong katuwaan hango sa isang phrase na paulit ulit na binanggit sa video, "I'm a liar" ni pinagdugtong sa isang salitang "AMALAYER". May ibang gumawa ng sariling version ng videong ito, ang iba naman ay nilagyan ng tono at ginawang awitin.
1. Ang Pamamayagpag ng Karera ni Jessica Sanchez sa American Idol
Simula nang may Fil-Am na nakapasok sa mga naunang season ng Singing Search na American Idol sa katauhan nila Camille Velasco at Jasmine Trias, inabangan na natin ang bawat season kung may Fil-Am na makakapasok sa nasabing palabas. Hindi nga tayo nabigo, dahil naulit ang pag pasok ng isang Pinoy sa Top 12 noong season 7, Si Ramiele Malubay na maaga ring naeliminate sa show. Nasundan pa ito noong season 10, si Thia Megia na hindi rin nagtagal ang karera sa nasabing palabas. At nitong huli, isang Filipino-Mexican-American ang namayagpag sa season 11 ng American Idol. Si Jessica Sanchez.
Audition pa lang ay hindi siya nagpahuli sa libo libong nangarap na maging American Idol. Nakapasa din siya sa bawat cut na ginawa sa Hollywood week, hanggang sa marating niya ang pinaglalabanang top 13. Patuloy niyang pinahanga ang mga judges sa sa bawat linggo na pagpapamalas ng galing sa pagkanta.
Dumating ang linggong hindi inaasahan ng lahat, ang muntikang pagkakatanggal sa kanya sa American Idol. Kasama si Joshua Ledet at Elise Testone, sila ang napunta sa Bottom 3. Kahit mismong mga Judges ay hindi inaasahan na siya ang makakakuha ng pinakamababang boto nung linggong iyon. Kaya ginamit na ng mga judges ang kanilang 1-time judges' save vote. Hindi naman sila nagkamali sa kanilang desisiyon dahil nagtuloy tuloy ang pamamayagpag ng karera ni Jessica sa American Idol. Hindi na siya muling nalagay sa alanganin hanggang sa tanghaling isa sa mga lalaban sa top 2 para sa titulong American Idol kasama si Phillip Phillips.
Naging gitgitan ang labanan nila Jessica at Phillip noong Finale, dahil naging hati ang opinyon ng mga judges bawat round ng kompetisyon. Ang Round 1 ay nakuha ni Jessica Sanchez. Lahat ng Hurado ay nag-agree na mas magaling siya sa unang round. Sa Round 2, naging hati ang opinion ng mga hurado; para sa kanila ay patas ang laban nila Jessica at Phillip sa round na iyon. At sa round 3/ final Round na ang kakantahin nila ay ang magiging carrier single nila kung sakaling sila ang tanghaling panalo. Home ang kinanta ni Phillip Phillips, samantalang Change Nothing naman ang kay Jessica Sanchez. Sa huling round, lahat ng judges ay nagkasundo na medyo lumamang si Phillip kay Jessica at medyo nakulangan sila sa kanyang performance. Sa huli, itinanghal na winner si Phillip Phillips at Runner-up si Jessica Sanchez.
Naging hati ang opinion ng mga fans pagkatapos ng finale. May mga natuwa sa pagkapanalo ni Phillip ngunit may iba na sa tingin nila ay si Jessica Sanchez dapat ang nanalo, at doon na nagsimula ang pagbansag sa kanya ng "World Idol" dahil minahal siya ng mga fans saan mang sulok ng mundo. Inabangan din siya ng mga Pinoy fans kasama ng kanyang finalist sa kanilang Idol Tour na dumaan dito sa bansa.
Ito ang sa tingin kong number 1 na nagtrending ngayong taon, dahil halos kalahating taon ding umere ang American Idol sa TV, at dahil sa galing niya ay halos maabot na niya ang titulong American Idol, at syempre, ang tour nila na inabangan dito sa bansa.
kung sa tingin niyo na may iba pang moments, events or issue na nagtrend ngayong taon, pwedeng pwede ninyong ilagay sa comment box sa ibaba ng entry na ito. Maraming salamat sa pagsama sa akin sa pagreminisce ng mga moments na nagtrending ngayong taon. Advance Happy New Year sa ating Lahat! :)
No comments:
Post a Comment